ढुंगा, गिट्टी र बालुवा उपलब्ध नभएपछि उपत्यकामा कालोपत्रे गर्ने काम ठप्प

काठमाडौ ।ढुंगा, गिट्टी र बालुवा उपलब्ध नभएपछि उपत्यकामा कालोपत्रे गर्ने काम ठप्प हुन लागेको सडक डिभिजन कार्यालय काठमाडौंका डिभिजन प्रमुख कुशेर नेपालीले जानकारी दिए । उनका अनुसार दर्जनभन्दा बढी ठाउँमा काम भइरहेको थियो । अहिले ठप्प हुँदै छ। ‘कामले गति लिँदै बन्दाबन्दी (लकडाउन) मा चाँडै भइरहेको थियो,’ उनले भने, ‘तर, निर्माण सामग्री नभएपछि साइटमा काम रोक्नुपर्ने स्थिति छ ।’ अहिले स्टक सामानले एक–दुई दिनभन्दा धेरै धान्न नसक्ने डिभिजनले जानकारी दिएको छ ।

पछिल्लो समय गौशाला–चाबहिल, एयरपोर्ट–गौशला, टोखा–छहरे, बल्खु–दक्षिणकालीलगायतका ठाउँमा ढलान, कालोपत्र ओभर–लेको काम भइरहेको थियो । अब निर्माण सामग्री नपाएसम्म काम रोक्नुको विकल्प नभएको डिभिजन प्रमुख नेपालीले बताए ।

क्रसरबाट निर्माण सामग्री ल्याउन समस्या
दैनिक ३० टिपर ढुंगा, गिट्टी, बालुवा काठमाडौं डिभिजनअन्तर्गत मात्र खपत हुन्छ । काठमाडौंमा प्रयोग हुने निर्माण सामग्री काभ्रेकोको रोसी गाउँपालिका र भुम्लु गाउँपालिकाबाट ल्याउने गरिएको छ । त्यहाँबाट अहिले सामान ल्याउन समन्वय गर्न डिभिजनले जिल्ला प्रशासन र स्थानीय सरकारलाई समेत आग्रह गरिसकेको छ । यस्तै, सडक विभागलाई पनि जानकारी गराइसकेको छ । भौतिक पूर्वाधार तथा यातायात मन्त्रालयलाई जानकारी गराइसकिएको छ । भौतिक पूर्वाधारमन्त्री वसन्तकुमार नेम्वाङले काभ्रेका जनप्रतिनिधिलाई सहजीकरणका लागि आग्रह गरिसकेका छन् ।

 काठमाडौं प्रशासनबाट पास दिएर सामान ल्याउन पठाइएका केही टिपर उतै रोकिएका छन् । निर्माण व्यवसायी तथा क्रसरवाला भने स्थानीयले रोकेका कारण सामान ल्याउन नसकिएको बताएका छन् ।

त्यस्तै, निर्माण सामग्री लोड–अपलोड गर्ने कामदार नहुँदा पनि गाह्रो भएकोे नेपाल निर्माण व्यवसायी महासंघका अध्यक्ष रवि सिंहले जानकारी दिए । ‘कतिपय ठाउँमा भने स्थानीयले कोरोना संक्रमण हुने डरले रोकेको खबर आएको छ,’ उनले भने । 
 
तीन सय कामदार कामविहीन
अहिले काठमाडौंमा सञ्चालन भइरहेका आयोजनामा तीन सय कामदार खटिरहेका छन् । तर, काम ठप्प भएपछि धेरै कामदार अलपत्र हुनेछन् । सडक डिभिजनले भने सबै आयोजना सञ्चालन गर्दै जाने र सात सयजना कामदार आवश्यक पर्ने अनुमान गरेको थियो । तर, अहिले उपलब्ध कामदार नै कामविहीन बन्नुपरेको छ । सहज देखिएका काममा मात्र केन्द्रित भइरहेको, त्यसका साथै सुरक्षित रहन सकेसम्म छरिएर काम गर्ने गरेको थियो ।

केही काम तत्काल नगरे ठूलो क्षति
उपत्यकामा कतिपय काम तुरुन्त नगर्दा ठूलो क्षति हुने अवस्था छ । त्यसकारण पनि लकडाउनमा सडक डिभिजन सक्रिय थियो । डिभिजनका अनुसार पुतलीसडकमा ह्युम पाइप हाल्ने काम भइरहेको छ । यो काम सामान्य अवस्थामा गर्न खोज्दा धेरै बाधा आउँछ । अहिले एकै दिन हुने काम सामान्य अवस्थामा दुई दिनमा पनि सकिँदैन । ट्राफिक व्यवस्थापनमा उत्तिकै कठिनाइ हुन्छ ।

त्रिपुरेश्वरदेखि थापाथली कालोपत्रे (ओभर–ले) गर्ने काम चार दिनमा सक्ने गरी डिभिजनले योजना बनाएको थियो । तर, भिड र सवारी व्यवस्थापन गर्नु नपर्दा एकै दिनमा सकिने थियोे । काम रोकिँदा भविष्यमा भारी पर्ने को–डिभिजन प्रमुख कुवेर नेपालीले बताए ।
 
टोखा–छहरे सडकको ढलान रोकियो  
काठमाडौं उपत्यकाबाट बाहिरिने महत्वपूर्ण नाकामध्येको एक टोखा–छहरे सडकमा ढलानको काम केही दिनअघि मात्र थालिएको थियो । अहिले काम रोकिएको छ । निर्माण सामग्री अभावले काम रोकिएको हो ।

ढलानका लागि २८ दिन आवश्यक पर्ने भएकाले त्यसैअनुसार काम भइरहेको थियो । ४० जना कामदार बन्दाबन्दीदेखि शिवपुरी निकुञ्जको गुर्जुभञ्ज्याङमा रोकिएर बसेका थिए । ती कामदारले ढलानको काम गरिरहेका थिए । बन्दाबन्दीपछि सवारी ट्राफिक पनि लगभग नभएको अवस्थामा काम गर्न सहज भइरहेको थियो ।

नुवाकोट, रसुवा, धादिङलगायत चीनसँगको महत्वपूर्ण नाका रसुवागढीसम्म जाने यस सडकको स्तरोन्नतिले आउँदा दिनमा यात्रा गर्न धेरै नै सहज हुने थियो । साथै, दुर्घटना न्यूनीकरण गर्न र पेट्रोलियम पदार्थको खपत घटाउन पनि महत्वपूर्ण हुने आशा थियो । 

बल्खु–दक्षिणकालीको ढलान पनि ठप्प  
पछिल्ला केही वर्षदेखि बर्खामा हिलो र हिउँदमा धुलोले यस सडकका प्रयोगकर्ता तथा स्थानीय दिक्क भएका थिए । स्थानीयले धेरैपटक सडक कालोपत्रे गर्न माग गरे पनि सुनुवाइ भएको थिएन । स्थानीयले धुलोका कारण जनस्वास्थ्यमा विभिन्न समस्या आएकाले कैयौँपटक सरकार र जनप्रतिनिधिको ध्यानाकर्षणसमेत गरेका थिए । तैपनि, सडकको हालत सुध्रिएको थिएन ।

तर, कोरोना संक्रमण नियन्त्रणका लागि लकडाउन गरेपछि यो सडक ढलान गर्ने कामको थालनी भएको थियो । ढलानपछिको कालोपत्रे भने लकडाउन खुलेपछि पनि गर्न सकिने गरी काम भइरहेको थियो । तर, अहिले काम ठप्प भएको छ ।