बुसोकुसेकिका कविता - श्रीराम श्रेष्ठ

 बुसोकुसेकिका कविता 

- श्रीराम श्रेष्ठ 

१.

एकअर्कामा

विश्वास पस्दै गर्दा

बन्दै आफन्त

नछुटिने विश्वास

समय बित्दै जाँदा

कुडियो आफ्नै मन ।

२.

अल्पिँदै बस्दा

मनोभाव लुकेछ

जाग्यो वितृष्णा

वैरागीले घेरेको

टोलाइ बस्दा एक्लै

सम्झे भिखारी माया ।

३.

कालो समय

अन्धकार छिचोल्दै

कठोर बनेँ

विद्रोहको मसाल

घिस्रिँदै अघि बढ्दै

सुख बटुल्ने धोको ।

४.

स्वर्गीय स्वप्न

आँखामा टिलपिल

बिर्सेको सम्झे

जोडिएको विश्वास

भताभुङ्ग सपना 

वेदनाले झस्कायो ।

५.

जोडेको मन

विश्वास गुमेपछि

टाढियो माया

सम्झनाले तर्सेको

भूत बनी आँखैमा

सम्झेको आफ्नोलाई ।

६.

प्रतिस्पर्धामा

कमजोर ठानेर

कामेको मुटु 

डरले सातो लिँदा

तेर्सिएर गुमेको

समालिने कसरी ।