त्रिशुली । देशको राजधानीसँगै जोडिएको जिल्ला भए पनि केही महिना अघिसम्म सामान्य बिरामी हुनासाथ काठमाडौंका विभिन्न अस्पतालमा उपचारका लागि लैजानुपर्ने सकस नुवाकोट र रसुवावासीले भोग्दै आएका थिए । सरकारी अस्पताल, त्यसमा पनि भवनको अभावसँगै थोरै शैया र एकदुईजना डाक्टरको भरमा बिरामी उपचार सेवा दिनुपर्ने हविगत देखेरै नागरिकहरुको यसप्रति विश्वास र भरोसा खासै थिएन । तर, अब राजधानीका ठुला र सुविधासम्पन्न अस्पतालभन्दा कम स्तरको छैन, त्रिशुली अस्पताल ।
उत्तरी धादिङसहित रसुवाले समेत स्वास्थ्य सेवा लिँदै आएको नुवाकोटको यो जिल्ला अस्पतालले दुईदेखि तीन वर्षको अन्तरालमा विभिन्न जटिल शल्यक्रियासहितको उपचार सेवादेखि पर्याप्त जनशक्ति र भौतिक पूर्वाधारको विकास गर्दै विगतमाझैँ राजधानीका अस्पतालहरुमा बिरामी बोकेर दगुर्नुपर्ने झन्झट तथा बाध्यताबाट यहाँका सर्वसाधारण मुक्त भएका छन् ।
नुवाकोटको त्रिशुली अस्पतालमा ईन्डोस्कोपी सेवा सुचारु गरिएको छ ।
अस्पतालमा १६ गते शनिबारबाट इन्डोस्क्रोपी सेवा सुचारु गरिने अस्पताल व्यवस्थापन समितिका अध्यक्ष अर्जुन न्यौपानेले जानकारी दिए ।
अस्पतालमा उक्त सेवा सुरु भएसँगै ईन्डोस्कोपी गरेर उपचार गर्नुपर्ने बिरामीलाई काठमाडौं धाउनुपर्ने बाध्यताको अन्त्य भएको अस्पतालका मेडिकल सुपरिटेन्डेन्ट डा. दिपेन्द्र पाण्डेले जानकारी दिए ।
सिमित श्रोतसाधान, जनशक्ति र पुर्वाधारबिनै सञ्चालन भइरहेको अस्पताल, त्यसमा पनि राजनीति गर्ने थलोका रुपमा परिणत गरिएपछि नाजुक अस्पताललाई सफल नेतृत्व र व्यवस्थापन गर्ने सही व्यक्तिको हातमा दिँदा त्यसले जिवन पाउँछ भन्ने नमूना उदाहरण त्रिशुली अस्पतालले दिएको छ ।
Comments